1Pe 4 | KMG | STEP | Kristo e sahac šâic manawecte ŋoŋe ijaha eniŋte hâbi-ŋeŋic hepie huzejec. Ehuc šiŋuc mananšepieŋ, moc e sahac šâic manaekaczi sâqocnere ninikec bâfuaekac.

1 Peter 4

Jesuzi sahac šâic manawecte ijaha manahuc sâqocne qikiŋnezo

1 Kristo e sahac šâic manawecte ŋoŋe ijaha eniŋte hâbi-ŋeŋic hepie huzejec. Ehuc šiŋuc mananšepieŋ, moc e sahac šâic manaekaczi sâqocnere ninikec bâfuaekac. 2 Eme sahacko juju dameŋ-ticne fokac sâc sasecte gie mi bapa Anuture micdâŋ sawa reŋkehuc juzejec. 3 Juwicnao qâpuc wiac šiŋuc ehuc jumbiŋ: Wiac gapec tâmiric ee, sasec, opâ momori âmbâŋ nânâ, bec qowi âmbâŋ nânâ, tiwâ sisiricko nânâ, nemu burec kiŋaŋ qaqajare, wiac i hâcne ewarehuc jukupie micne qawec. 4 Eme ši ine qâpuc jaŋe sâqocnere šâkâŋko fohapie mi qâtec-jopaeŋgopieŋte manapie moc eme mu supaic eŋareeŋgopieŋ. 5 Erâ jaŋe juku jukicne hâmokicne fuŋne-nâŋec bataniŋkeocte šawierâ jukac erao dâŋgie baniŋmu. 6 Eme fuŋne šiŋucte hâmokicne wâc Biŋebiaŋ jazakicne: Jaŋe ŋifec ŋic hata fokac irec sâcko sahaczi okacne roniŋte, â ŋifec Anuture hata fokac irec sâcko mârozi juniŋte.

Dameŋ bembeŋkekacte ââgo erâ babafic ezo

7 Wiac sasawa irec dameŋ bembeŋkekac. Irec ŋoŋe maŋsowa â pectâc juhuc nunumure afeckenšepieŋ. 8 Erâ maŋŋeŋiczi jauŋ babac ehuc junšepieŋ. Maŋjauŋhec juhuc kiŋ bebehec sâcne ezo. 9 Ŋoŋe mutakic tâmiric hezu hewâneŋ eec enšepieŋ. 10 Ŋoŋe Anutuzi miti mâriri fuŋne fuŋne tahac-ŋopawec, i ŋicne ŋicne foŋarekac sâc aimuŋ bajuhuc bâmec babac â dodopec ehuc junšepieŋ. 11 Moc e miti muocmu i Anuture dâŋ jâmbâŋ ezejec, moc e gie mucnekicko baocmu ine Anutuzi tâpiri râcneme sâc bazejec. Ŋoŋe iŋuc epie Anuture huriri qâreŋ i Jesu Kristore erâ ŋoŋerao fua tâcnezejec. Eri tatamac â tâpiri i erao foweczi fohuc juocmu sanaŋ. Jâmbomac.

Jesure erâ šâic manahuc bubiaŋ bâfuazo

12 Jorocfâc-nane, ŋoŋerao hâbi qaqazure wiac micne momori fuawec fokac, eme ŋoŋe wiac šâŋe furu fua-nârekac muhuc bipic tatara mi enšepieŋ. 13 Ŋoŋe Kristore erâ šâic fâro manahuc sâc bubiaŋ bâfuanšepieŋ, eme juku eri tatamac-ticne fua tâcneme iŋuc jaha bubiaŋ sâko manahuc šeri bari eniŋmu. 14 Ŋoŋe Kristo šâŋe biŋe-ticnere musoc qâsoriŋ-ŋopapie manapie šerine ezejec. Wiac i eŋarepie tatamacte maqâreŋ, Anuture Mâro hâcne, ŋoŋerao waha juocmu. 15 Ŋoŋeraonec moczi šikare me fiucte me sindaŋte me penaroŋte šika kâpâcwâru faio mi fezejec. 16 Á moc e Kristoŋic jukacte šika kâpâcwâru ecnepie ine irec maname mimi busâqochec mi ezejec. E šâŋe i bajuhuc Anuture mumuteŋ bâfuazejec. 17 Manaŋgopieŋ, Anutu e fuŋne babataniŋ gie-ticne ŋicfâc-ticne nâŋâcnao fuŋkerâ baocte dameŋne maickekac hâcne. Nâŋâcnao qanaŋ fuŋkerâ baraku Biŋebiaŋ-ticne qikiŋneeŋgopieŋ jaŋerao batarame sâc weniŋucne fuaocmu? 18 Â

“Ŋic tiŋne e okac dameŋko bipic tatara ecnehame
miti qiqikiŋ â sâqocne bapa e wenac eocmu!”
19 Eme irec Anutuzi maname sâckeha fific guguriŋ faio feniŋmu jaŋe maŋ qâqâtâc-jeŋic i bâbâfua mume sasanaŋ erao râehuc eehâmo gie banšepieŋ.